புற்றுநோயை வென்ற 1 லட்சம் தமிழர்கள்! ரகசியம் என்ன? நீங்களும் அறிய வேண்டிய சில உண்மைகள்!

"புற்றுநோய் வந்துவிட்டதா? இனி அவ்வளவுதான்..." - ஒரு காலத்தில் தமிழக வீடுகளில் பயத்துடன் கிசுகிசுக்கப்பட்ட இந்த வார்த்தைகள் இன்று மெல்ல மெல்ல மறைந்து வருகின்றன.

ஒரு காலத்தில் தீர்க்க முடியாததாகக் கருதப்பட்ட புற்றுநோயின் நிலை, தற்பொழுது முறையான விழிப்புணர்வுடன் ஆரம்பநிலையிலேயே கண்டறிந்து சிகிச்சை எடுத்துக்கொள்ளும்பொழுது குணமடையும் வாய்ப்புள்ளதாக முன்னேற்றம் கண்டுள்ளது.

1. பயத்தை விட விழிப்புணர்வு பெரியது!

பலரும் புற்றுநோய் பரிசோதனைக்குச் செல்லத் தயங்குவது நோய்க்குப் பயந்து அல்ல, அதன் முடிவுக்குப் பயந்துதான். ஆனால், தற்போதைய தரவுகள் காட்டும் உண்மை வேறு:

• 90% வெற்றி வாய்ப்பு: புற்றுநோயை முதல் அல்லது இரண்டாம் நிலையில் கண்டறிந்தால், குணமடைவதற்கான வாய்ப்பு 90%-க்கும் அதிகம்.
• தமிழகத்தின் சாதனை: இன்று தமிழகத்தில் மட்டும் சுமார் 1,10,000-க்கும் மேற்பட்டோர் புற்றுநோயை வென்று (Survivors), தங்களின் இயல்பு வாழ்க்கையைத் தொடர்ந்து கொண்டிருக்கிறார்கள்.
• நவீன சிகிச்சை: இன்று 'டார்கெட்டட் தெரபி' (Targeted Therapy) போன்ற சிகிச்சைகள் மூலம், ஆரோக்கியமான செல்களுக்குப் பாதிப்பின்றி புற்றுநோய் செல்களை மட்டும் துல்லியமாக அழிக்க முடியும்.

2. புற்றுநோய் அபாயத்தைக் குறைக்க எவற்றைத் தவிர்க்க வேண்டும்?

நமது அன்றாட வாழ்க்கை முறையில் சில மாற்றங்களைச் செய்வதன் மூலம் புற்றுநோய் வரும் அபாயத்தை பெருமளவு குறைக்க முடியும். நாம் தவிர்க்க வேண்டிய முக்கிய விஷயங்கள்:

• புகையிலை மற்றும் மது: புகைப்பிடித்தல் மற்றும் புகையிலை பழக்கம் (Beedi, Cigarette, Gutka) புற்றுநோய்க்கு மிக முக்கிய காரணமாகும்.
• பதப்படுத்தப்பட்ட உணவுகள்: ரசாயனங்கள் சேர்க்கப்பட்ட உணவுகள், பாக்கெட் தின்பண்டங்கள் மற்றும் அதிக சர்க்கரையுள்ள உணவுகளைத் தவிர்க்க வேண்டும்.
• அதிகப்படியான உடல் எடை: உடற்பயிற்சியின்மை மற்றும் உடல் பருமன் பல வகையான புற்றுநோய்களுக்கு வழிவகுக்கலாம்.
• சுற்றுச்சூழல் நச்சுகள்: பிளாஸ்டிக் பாத்திரங்களில் சூடான உணவுகளை உட்கொள்வதையும், பூச்சிக்கொல்லி தெளிக்கப்பட்ட காய்கறிகளை சரியாகக் கழுவாமல் பயன்படுத்துவதையும் தவிர்க்க வேண்டும்.

3. பரம்பரை புற்றுநோய்: நீங்கள் தெரிந்து கொள்ள வேண்டியவை

"என் குடும்பத்தில் ஒருவருக்கு புற்றுநோய் இருந்தால், எனக்கும் வருமா?" என்ற சந்தேகம் பலருக்கும் உண்டு.

உண்மை என்னவென்றால், சுமார் 5% முதல் 10% புற்றுநோய்கள் மட்டுமே மரபணுக்கள் வழியாக தலைமுறைகளுக்கு கடத்தப்படுகின்றன.

உங்கள் குடும்பத்தில் ஒன்றுக்கும் மேற்பட்டவர்களுக்கு புற்றுநோய் பாதிப்பு இருந்திருந்தால், மருத்துவரின் வழிகாட்டுதலோடு ஒரு எளிய மரபணு சோதனை (Genetic Testing) மூலம் அபாயத்தை முன்கூட்டியே அறிந்து தகுந்த சிகிச்சை பெற்று நம்மை தற்காத்துக்கொள்ளலாம்.

4. குடும்பத்தின் ஆதரவு: பாதி மருந்து!

புற்றுநோயாளியைத் தொடுவதாலோ, அவர்களுடன் அமர்ந்து உணவருந்துவதாலோ நோய் பரவாது. அவர்களைத் தனிமைப்படுத்துவது நோயை விட அதிக வலியைத் தரும். "நாங்கள் உன்னோடு இருக்கிறோம்" என்கிற குடும்பத்தின் அன்பும் ஆதரவும் எந்த மருந்தையும் விட வேகமாக நோயாளியைக் குணப்படுத்தும்.

புற்றுநோய் என்பது கர்ம வினை அல்ல; அது ஒரு உயிரியல் மாற்றம் மட்டுமே.

விழிப்புணர்வோடு செயல்பட்டு சரியான நேரத்தில் கண்டறிவதும், தீய பழக்கங்களைத் தவிர்ப்பதும் அவசியம். மேற்கண்ட விழிப்புணர்வோடு இருப்பவர்களிற்கு புற்றுநோய் வாழ்க்கைப் பயணத்தில் ஒரு சிறு தடைக்கல்லே தவிர, பயணத்தின் முடிவல்ல!