புற்றுநோய் சிகிச்சை: கீமோதெரபி ஏன் அவசியம்? பயமில்லாமல் எதிர்கொள்வது எப்படி?

புற்றுநோய் என்றாலே நம்மில் பலருக்கு முதலில் நினைவுக்கு வருவது 'கீமோதெரபி' (Chemotherapy). இது ஒரு கடினமான சிகிச்சை என்ற பிம்பம் மக்களிடையே உள்ளது. ஆனால், நவீன மருத்துவ உலகில் புற்றுநோய் சிகிச்சையை ஆற்றல் மிக்கதாக மாற்றிட கீமோதெரபி ஒரு மிகச்சிறந்த ஆயுதமாக விளங்குகிறது.

கீமோதெரபி ஏன் முக்கியம்?

புற்றுநோய் செல்கள் உடலின் மற்ற செல்களை விட மிக வேகமாக வளரும் தன்மை கொண்டவை. கீமோதெரபி என்பது சக்திவாய்ந்த மருந்துகளைக் கொண்டு இந்த வேகமான வளர்ச்சியைக் கட்டுப்படுத்தும் ஒரு முறையாகும்.

• செல்களை அழித்தல்: அறுவை சிகிச்சைக்குப் பிறகு உடலில் எஞ்சியிருக்கும் கண்ணுக்குத் தெரியாத புற்றுநோய் செல்களை அழிக்க இது உதவுகிறது.
• கட்டியின் அளவைக் குறைத்தல்: சில நேரங்களில் அறுவை சிகிச்சைக்கு முன்பாகவே கட்டியின் அளவைச் சுருக்கி, அறுவை சிகிச்சையை எளிதாக்க கீமோ வழங்கப்படுகிறது.
• பரவுவதைத் தடுத்தல்: புற்றுநோய் உடலின் மற்ற பாகங்களுக்குப் பரவாமல் தடுக்க இது கேடயமாகச் செயல்படுகிறது.

பக்கவிளைவுகள் ஏன் ஏற்படுகின்றன?

கீமோதெரபி மருந்துகள் வேகமான வளர்ச்சி அடையும் செல்களை தாக்குகின்றன. புற்றுநோய் செல்கள் மட்டுமில்லாமல் நமது உடலில் முடி, நகம், ரத்த செல்கள் மற்றும் குடல் உட்புறச் செல்கள் ஆகியவையும் இயல்பாகவே வேகமாக வளரக்கூடியவை. மருந்துகள் இவற்றுக்கும் பாதிப்பை ஏற்படுத்துவதால் தான் பக்கவிளைவுகள் ஏற்படுகின்றன.

பொதுவான பக்கவிளைவுகள்

• அதிகப்படியான சோர்வு மற்றும் பலவீனம்.
• வாந்தி மற்றும் குமட்டல் உணர்வு.
• தற்காலிக முடி உதிர்தல்.
• பசியின்மை மற்றும் சுவையின்மை.
• ரத்த சிவப்பணுக்கள் குறைவதால் ஏற்படும் ரத்த சோகை.

பக்கவிளைவுகளை எளிதாகச் சமாளிப்பது எப்படி?

இன்றைய மருத்துவ முன்னேற்றத்தால், இந்தப் பக்கவிளைவுகளைக் கட்டுப்படுத்த மிகச்சிறந்த வழிகள் உள்ளன.

• குமட்டல் / வாந்தி: மருத்துவர் பரிந்துரைக்கும் 'Anti-emetic' மருந்துகளைச் சரியாக உட்கொள்ள வேண்டும். காரமில்லாத, மிதமான உணவுகளைச் சிறு இடைவெளிகளில் சாப்பிடலாம்.
• முடி உதிர்தல்: இது தற்காலிகமானது என்பதைப் புரிந்து கொள்ளுங்கள். சிகிச்சை முடிந்த சில மாதங்களில் முடி மீண்டும் வளரத் தொடங்கும். அதுவரை ஸ்கார்ஃப் அல்லது விக் பயன்படுத்தலாம்.
• சோர்வு: போதிய ஓய்வு அவசியம். சிறு நடைப்பயிற்சி மற்றும் தியானம் மனதையும் உடலையும் உற்சாகப்படுத்தும்.
• தொற்று பாதிப்பு: கைகளை அடிக்கடி கழுவ வேண்டும். கூட்டம் நிறைந்த இடங்களைத் தவிர்க்க வேண்டும். காய்ச்சல் வந்தால் உடனடியாக மருத்துவரை அணுக வேண்டும்.
• உணவு முறை: அதிக நீர்ச்சத்து உள்ள ஆகாரங்கள், பழங்கள் மற்றும் புரதச்சத்து நிறைந்த உணவுகளைச் சேர்த்துக் கொள்ள வேண்டும்.

கீமோதெரபி என்பது ஒரு தற்காலிகப் போராட்டம் மட்டுமே. ஆரம்பநிலை கண்டறிதல், மருத்துவரின் ஆலோசனை, மற்றும் சத்தான உணவு, சரியான மனநிலை ஆகியவை புற்றுநோய் சிகிச்சையை மேலும் பயனுள்ளதாக மாற்றுகிறது.